哈哈，EGM 終於完了，也算是了結一件心事⋯⋯
坐大佬隔離果然耳濡目染，大佬威逼利誘下，我折服於她的淫威。
早說過了⋯⋯ 果然難逃厄運⋯⋯ 誰編的位子？
Month: July 2010
未來的回憶
請 抬頭看我 靈魂不要怕 目光中赤裸
當 垂頭喪氣 求能給你一點驚喜
送給大家，我 Xanga 的主題曲：張敬軒《未來的回憶》！
（2010 軒動心弦演唱會，好靚⋯⋯）
<時代> THE | AGE
中意一首流行曲可以有兩隻：一係一聽上去就覺得好聽，一係就浸淫一輪先開始中意。
一開始聽古巨基新碟【時代】，一開始覺得佢係失敗之作。
比過幾個朋友聽，佢地都覺得隻碟麻麻…
但係我聽多幾次，開始覺得好好聽，而家已經覺得佢係基仔出過咁多隻碟最好嘅一隻。
無怪六日就突破白金銷量。
中意嘅原因？
一、聽咗一排覺得好好聽；
二、基仔唱功又勁咗；
三、歌名精打細算；
四、最重要嘅係，亦都係我中意基仔嘅其中一個原因：有別於其他歌手，佢嘅碟有 theme！
由 guitar fever 開始，去到 string fever… 呢次係【時代】，講嘅係香港呢十年嘅轉變、社會風氣、離奇怪事、社會現象等等…
除咗熟識感親切感外，仲有就係比倒人嘅幻想空間、反省空間。
喺呢度就等我簡略講講每首歌啦！ XD
- 【時代】（派台 theme song）
呢首係我嘅至愛，講嘅係香港人急速嘅腳步，林夕想提醒大家放慢腳步，先可以過得開心，發現倒生活嘅真諦，唔好做工作奴隸。
金句：何妨任陰影壓下來 心晴朗 - 【獨男】（派台主打歌）
講嘅係一般獨男嘅行為，一開始聽覺得麻麻，聽多幾次覺得有 feel，莫非我都係個獨男？XD （其中一句係「然而無人能追怎麼要追」，笑咗 XP）
金句：我未相信沒朋友 伸出雙手打到有 你願跟我做朋友 但摸不到我手 - 【鑽石敗犬】
一聽歌名唔知 up 乜。後尾先知，「敗犬」一詞來自日本，是指「年過三十、事業有成但又未婚的女性」。呢首歌鼓勵嗰 D 等又等揾又揾都冇男朋友嘅女仔，尤其係 30+ 嗰 D。
金句：相信在八十歲後能擁吻 年月繡下美麗皺紋 你用際遇勉勵後人（林若寧好詞！） - 【北半球選美離奇火警事故】
咩歌嚟嫁，個名咁奇怪咁長嘅？哈哈，原來呢首歌都幾俗！ 「北半球」原來指嘅係 D 女仔著低胸露出嚟嘅嘢，借代衣著性感嘅女性。成首歌一聽上去似爛歌，但係要研究過先知，原來係大師作品！狂用暗喻，諷刺時下嘅選美參加者、放棄讀書嘅「o靚模」等，簡單嚟講就係以「美」走事業嘅時下女性。
金句 1：原來是有一發飛釘將那總掣射中 有一對喱士燈罩燒燶（暗喻輿論，後面嗰個比喻係人都知啦，不過俗得文縐縐，YOU WIN~ XD）
金句 2：但黑煙已經太濃 出口已經太濛（哈哈，呢句暗喻選美嘅黑幕，太搞笑喇~ XD） - 【Hea】
哈哈，好歌名！成首都幾好聽，D 歌詞好得意！其實係代入時下青年嚟比大家睇吓我地成日想 hea 嘅特質。基仔大改風格！
金句 1：講真我無乜點 做過中港線 然後快餐店 總之要無風險 沒有升職線 橫掂無得變錢
金句 2：我嘅策略係 小個便 睇下點 攤陣先 無謂要對自己咁Mean But個Mean字係點解先 咁要望下Supervisor嗰塊面 八十後 九十後 都咁扁 唔該準時六點後 Yeah 俾我閃 - 【愛風】
呢首係聽唱功，基仔嘅柔真音同真音 switch 到完全係 smooth 到喊，呢樣係陳XX同張XX都無法比擬嘅，亦都係基仔把聲咁舒服嘅秘訣。
金句：惗唔倒… XD 不過有好多數碼術語不知不覺間加咗入去 - 【迷博】
一睇就知講微博！XD 代入咗一個人，佢中意咗另一個人，喺網絡度睇人地日記，留意愛人嘅一舉一動。去到呢度，惗起以前有人日日用 XangaSpy 睇我 xanga 以為我唔知，以家惗番起，都係笑笑算喇~
金句 1：你拒絕我 現實裡喜歡你 但網絡裡沒法阻止我 遙遙望你
金句 2：呼吸到你 無論你置身何地 - 【公主病了】
哈哈，女仔成日話男仔「獨」，男仔可以報復喇！「公主病」係「港女」嘅特徵之一，病癥包括：自認為很美麗，條件很好；成日洗錢，男友嘅錢就更加，仲要以為係天經地義；最搞笑嘅係有呢個病嘅女仔永遠唔會承認自己有病。呢首歌又係代入，個男仔就晒個女仔，個女仔就喪心病狂（XD），寫出時下「一個願打，一個願挨」嘅情況。呢首歌又係基仔唱功嘅 showtime！（個男仔真係好好，「公主 不會上路 還好 有我 領旨即到 但奴才又未值得傾慕 摘花的亦非應份惜花如何是好 閒坐一世 誰又敢對你負責 唯獨我仍當寶」。基仔話佢頂唔順公主病，其實我都覺好難頂~ XD）
金句：好男人已死光了 剩下甚麼都嘲笑 - 【蝸居】
好值得人反省嘅一首歌。講嘅係一對男女，為咗有一個溫馨嘅家，不惜一切賺錢，到最後因為溝通不足，個家散咗。基仔唱得好有感情，觸動倒我嘅心弦。林若寧好詞！
金句 1：同捱苦 同用一生的心血換磚瓦 期望一間屋建築一家 長出花 美麗像童話 不惜花一世努力爬
金句 2：連情感 埋在多麼的高貴爛磚瓦 遺憾這一家變一堆沙 一堆沙 再化做名園 一家的愛昂貴嗎？ - 【惡搞】
哈哈，好俗嘅快歌！不過有讚有彈，唯有彈吓呢隻歌啦… 唔係好啱我胃口…… XD
金句：捱捱捱做做做哪個怕抑鬱死哪會怕活活地笑死
總結嚟講，呢隻碟係基仔出過咁多隻碟最好嘅一隻，聽得少嘅朋友可以聽多 D，聽吓佢嘅歌詞；平時好作反省嘅朋友，呢隻碟啱你；至於只係等屋企唔好咁靜咁寡而開喇叭嘅朋友，就唔好晒錢買呢張碟喇~ XD
今日出街嗰時，聽倒隔離屋有人拉琴。
哈哈，係 twinkle twinkle little star，十年前倒我都拉梗呢個。
情不自禁，思緒飛番去六七年前…
嗰時我每日都練琴，而且喺窗邊練… 有一日練練吓琴，聽倒有鋼琴聲，好奇望過去，應該係一個女仔彈梗琴。
聽倒佢彈嘅歌我都識，就攞起支小提琴同佢拉埋同一隻歌，聲音透過窗口傳咗去佢嗰度…
自此，我地間唔中都會合奏，相隔一層，我見唔倒佢，佢見唔倒我，但係彼此聽倒大家嘅音樂，仲有感覺倒嗰種默契…
曾經有惗過去拍門，大家玩吓合奏（嗰時唔識鋼琴，唔可以玩四手聯彈）。不過最後淆咗底…
有一日佢搬屋，嗰部鋼琴都搬走咗。刹那一陣傷感，帶住半分寂寞，到而家都仲記得好清楚…
人生嘅第一個知音人，就咁離我而去…
越大越發覺，知音人真係好難遇上…
希望隔離屋嗰個細路，都可以透過自己嘅音樂，揾倒自己嘅知音人…
PS 喺以前真係惗過，要揾番個識彈琴嘅老婆，咁就有個人可以成日同我合奏，用音樂嚟交流；而家呢？算喇，通殺！ XD
今日食麥記，有一個女仔講嘢把聲好清脆，所以留意咗陣佢講乜…
點知佢突然提起三個字，令我全神貫注聽落去：
高主教！
「高主教 D 男仔好…」佢突然靜咗落嚟，輕輕搖咗幾吓頭…
但係我已經明白佢想講咩：佢係話高記 D 男仔好獨…
起初有少少嬲，不過惗一惗：佢都講得啱嫁噃…
跟住，我地高記仔三四年前一齊踢毽、玩足球機、放學後捉棋，甚至某某帶鹹片番嚟睇，一幕一幕浮喺我眼前…
哈哈，的確我地係幾獨，不過我地有嘅係 brotherhood，記得我地曾經成班喺小息唱歌，prefect 叫唔停，老師入嚟都照唱…
亂拋垃圾、上堂楚河漢界掟紙波等等，對於去到中六入咗間男女校嘅我嚟講，已經緣盡。
突然有 D 懷念以前大家講粗口嘅日子，笑都笑死（可惜我中一勁講中二就戒咗，哈哈）。
D 人成日問我男女校好 D 定男校好 D，我一定答男校：有女仔喺度，做呢 D 嘢會比人鄙視，會比人話「獨」…
但係男人冇 brotherhood，仲邊係男人？哈哈…
最後我發覺我自己沉思嘅時候一直望住個女仔，比個女仔發覺咗，有 D 唔自在咁。
哈哈，失禮…… 轉頭向圖書館衝去……
各位如果有時間可以看看我的《大高記小記》…… ^_^