1/11 蘋果出 iPad Air，第一時間去攞。
講真，感覺今次升級唔係咁吸引，如果唔係舊嗰部 iPad 3 粒 Home 摯開始有問題都未必買。
左：iPad Air；右：iPad 2
左：iPad Air；右：iPad 2
左：iPad Air；右：iPad 2
好，講啲相睇唔倒嘅嘢先。其實今次 iPad AIr 升級，最明顯都係更輕、更薄更小、更快。
iPad Air 的確比 iPad 2 – 4 輕好多，相信話唔係好輕嘅人以前冇用過 iPad 或者同 iPad 大小相若嘅平板電腦。喺我一喺個盒攞出嚟嗰刻已經強烈感覺倒 iPad Air 輕咗好多。但係，之後用過，單手揸住睇戲，始終都係會攰，建議女士都係選擇 iPad Mini 比較好，除非有特別需要，例如好似我咁眼盲。 LOL
至於速度，的確比上幾代 iPad 有顯著嘅提升。網上已經有好多測試，發現蘋果聲稱比 iPad 4 快 2 倍所言非虛。我用過幾個鐘以來，絕少碰到窒嘅情況，印象最深窒嘅一次反而係蘋果個 app Game Center，一般開 app 非常迅速。網上有人測試話，1 分鐘嘅短片用 iMovie 做 rendering 嘔個 1080p 嘅 video 只需 10 秒，當初我都半信半疑，不過自己測試後發現差不多，表現十分驚人。感覺上 iPad Air 嘅速度提升好大。（註：iPad Air 同 iPhone 5s 一樣用 A7 處理器，不過 iPad Air 嘅 A7 處理器較快，時脈比 iPhone 5s 快 100 MHz）
相機方面冇特別升級。前面個相機蘋果聲稱用更大嘅 pixel，照片質素會提高。可能本身前面拍攝個質素都係麻麻，感覺冇乜特別進步。值得留意嘅係 iPad Air 多咗個收音，可以做倒減低噪音嘅效果，理論上拍片音訊方面應該會好好多，不過我未詳細試過，呢度不作評論。
喇叭改為兩個，一左一右，感覺上質素好咗之餘，聲音變得更加立體。不過當開住喇叭播片時，手指摸上去個 mon 度震咗好多，可以幫你手指做埋按摩。 LOL
電池導航能力方面，雖然 iPad Air 嘅電池容量比 iPad 4 少咗一大部分（輕薄嘅代價，對，輕薄係有代價嘅 XP），不過電池可用時間不減反增。
總的來說，我覺得 iPad Air 最大嘅賣點係輕好多快好多，如果你用梗 iPad 3 手頭又比較鬆，升級係值得嘅。如果你用梗 iPad 4，咁就要睇吓輕同快對你嚟講有幾大價值（對我而言，如果我有 iPad 4 我未必會升級，因為想見倒嘅指紋辨識系統等吸引功能欠奉，等下一代 iPad 先升級會比較值）。
最後講講我點解揀 iPad Air 唔揀 iPad Mini with Retina Display。除咗 iPad Air 有外觀升級外，我經常用 iPad Air 睇書睇片上網，屏幕大小對我嚟講好重要，相反我唔需要理會 iPad 嘅大小（反正都係塞入個袋度）同重量（而且差唔遠，女朋友左手捧 iPad Mini 右手捧 iPad Air 話唔覺有分別，唔好忘記 iPad Mini with Retina Display 比 iPad Mini 要重，thanks to the new Retina Display），加上 iPad Mini with Retina Display 供應好緊張，要同班果農爭，可能要 1 月倒先有得用。
So far 幾滿意，不過有種空洞嘅感覺，因為除咗快咗同輕咗外，冇新功能就好似同用梗舊嗰部 iPad 冇乜分別咁⋯⋯ LOL