近來冇乜特別，除咗忙外，仲有忙。
爸爸嘅新公司要開張喇，除咗幫佢做一番設計外，仲幫佢起 server 搞 network。
睇見下下下莊上莊，真係開心，恭喜佢地，同時都感覺自己開始老喇，係時候抽身喇，或者下年唔需要為佢地搞唔搞得成活動、fin bud 之類而頭疼。
百忙中抽空，幫 server 做 upgrade，順手 upgrade 吓個 blog。未搞好，將就睇住先啦。 😀
RIP 力尻
Andrew Mok 昨日深夜在醫院離開了我們。
初中認識他，那時和他打籃球，彈螢光筆，還有拗手瓜，和他是好朋友。
他很強，打籃球強，拗手瓜更強。記得那時他拗手瓜稱霸，我兩隻手也不敵他一隻左手；我手握力右手 3x，他可以左手挑戰 80。所以他得了 “力尻” 這個外號。
他強，但是他很喜歡幫人，很和藹可親。
後來他到了外國讀書，我們也因為地方和時間的原因，再也沒有見到對方了。
前幾天他父親 login 了他的 Facebook，寫了一篇 post，令我得悉他進了香港一家醫院，ICU 情況危殆。
晴天霹靂。
人大了，是否就要忍受看著朋友一個一個地走？
多謝你給了我們一段美麗的童年回憶，一路好走。
RIP Andrew。
後來⋯⋯
好多謝大家呢段時間對我嘅支持！感激有你地喺我身邊！我都祝福你地，身體健康！
喺發生嗰件事之後，嗰位醫生話去旅行冇問題，仲話我應該冇事。
血壓 keep 住偏高，不過有一晚靜止狀態上壓 177，下壓 121，第二日都比較高，所以再去睇醫生。
嗰位醫生臉色一沈，轉介咗我去心臟科，問佢去唔去得旅行（四個月前就 book 咗機票酒店），佢話由心臟科專科醫生決定。
一顆心，上上下下忐忐忑忑。去，又怕去旅行膽戰心驚冇癮，又怕突然出事；唔去，四個月嘅期待頓成空話，預支嘅錢都唔知會唔會冇曬（~HK$8,000）。
睇咗心臟科醫生，再做心電圖，加上照超聲波，心臟科醫生話冇問題，可以出發，番嚟再做腎 MRI 同 72 小時驗尿。
不過醫生話，未知道原因前唔可以比血壓繼續飆升，要我食血壓藥。
咁後生要食血壓藥，真係好少見，連幫我做 MRI 嘅護士都咁講⋯⋯
食咗血壓藥後真係低番啲，（~120, ~78）。
番咗嚟香港後，照咗 MRI，結果都係正常。醫生話轉藥，減低副作用。
但係番咗香港後轉咗藥後，開始去到（~135, ~86）。
可能香港真係對我嚟講太緊張喇，工作都 OK，係覺得時間唔夠比我去學嘢，啲官出嚟講吓嘢我又興咁樣⋯⋯ lol
所以話 IT 真係唔易撈！ XP 或者下次問問心臟科醫生有冇需要轉介我去精神科，哈哈。 XP
台北之旅
1/1
機場 –> 旅遊巴 –> 過站 –> 酒店 –> 師大夜市 –> 酒店
2/1
金鋒魯肉飯 –> 台北 101 –> 永康牛肉麵
3/1
三味香包子 –> 西門町 –> 蜂蜜苦瓜汁，豪大大雞排，蚵仔煎 –> 意粉
4/1
coco 老番屋 –> 淡水 –> 吉野家雙人鍋
5/1
度小月 –> 咖啡弄（忠孝店） –> 地下街 –> 爛鬼 Sogo –> 台北車站（化妝品店，電腦廣場） –> 搵往機場旅遊巴 –> 機場尋找度小月
特別食物：
溫泉蛋，香蕉，炭燒梅，統一雞蛋布丁
最接近死亡的一刻
上個禮拜發現，血壓有點高，醫生建議去做幾個測試，其中一個是心電圖。
其他測試的結果沒問題，還差心電圖，今日去做。
結果出來後，lab 的員工好凝重咁同我講：“先生，千祈唔好走開，護士嚟梗接你。”
“咩事？好嚴重？”
“有四個跡象，全部中曬，護士會推輪椅上嚟接你落去，你要冷靜，千萬唔好走，走咗有事我地好難負責。”
嗰一刻真係晴天霹靂。心情就似一個去睇感冒嘅病人聽倒自己患上絕症一樣。
過咗一陣，有個護士推咗架輪椅上嚟，我坐上去，戴上幫助呼吸嘅儀器。
我感覺好不安，心底覺得，好似係我個心隨時會爆炸一樣。
“點解咁遲先做心電圖？上個禮拜已經睇完醫生。心係最重要嫁你知唔知？點解唔做先？”護士講。
我更加不安。
落到去，抽血，量血壓，問有冇頭暈，心痛，頭疼⋯⋯ 幾個護士喺我身邊走嚟走去，加上佢哋唔同我講咩事，超級不安。
“叫 lab 驗血，urgent case。”
等驗血報告然後睇醫生。護士說有頭暈頭疼心疼要立即搵佢地。
等驗血報告嘅時候如坐針氈，好似等梗我個心開始有事嗰一刻咁。
過咗一個鐘倒，有個姑娘好急咁搵我，我心想不妙，原來佢話之前我太緊張，血液不足冇得化驗。
結果又抽多次血，繼續心驚膽顫地等待。
開始胡思亂想：點解我咁後生就有呢啲病？點解我咁不幸？我仲有好多我想做嘅嘢未做，好多我可以幫倒手嘅地方我未幫⋯⋯
然後開始發覺，一直以來都好幸福，有家人，有女朋友，有朋友，大家都對我好好，做咗好多有好多人做唔倒嘅嘢⋯⋯
突然有一刻想祝福每個身邊嘅人，多謝每個身邊嘅人，就算嗰啲我唔熟嘅，都好多謝佢哋喺我生命出現過㐧，使我發現原來自己嘅人生好精彩⋯⋯
然後一陣安定的感覺，生死有命，一切已經唔係我可以掌握，放鬆去翻開神一早為我準備好嗰生命嘅下一頁。
終於看過醫生，醫生話，心電圖判斷我心肌梗塞，但係進一步嘅驗血報告顯示我一切正常，肯定排除心肌梗塞嘅危機。
然後我問醫生，我下個禮拜去旅行，仲可以去嗎？
醫生微微點點頭，笑說：“點解唔可以？”
今次我學到，最重要唔係賺幾多錢，做過乜勁嘢，有幾多人認識你，而係一直喺你身邊嗰啲人；同埋健康生活嘅重要性。
翻到屋企，踏入家門嗰刻，深呼吸一口氣，原來已經好幸福。
幸福一直喺你身邊，你只需要去發現它，然後珍惜它。
